Семейде Оқушылар сарайына жаяу жүргіншілер көпірі салынады

Семей қаласындағы Оқушылар сарайы пайдалануға берілді. Осыған байланысты қала тұрғындары, әсіресе оқушылардың ата-аналары, нысанға жаяу қатынаудың ыңғайлы әрі қауіпсіз болуын қамтамасыз ету мәселесін көтеруде, себебі қазіргі уақытта оған көбіне жеке автокөлікпен ғана жетуге болады.

Абай облысы жолаушылар көлігі және автомобиль жолдары бөлімінің басшысы міндетін атқарушы Әділбек Увасиловтың айтуынша, биыл бір жаяу жүргіншілер көпірінің құрылысы басталуы жоспарланып отыр. Жоба қысқа мерзімде жүзеге асады деп күтілуде, өйткені өткел құрастырмалы металл конструкция түрінде салынбақ.

– Аталған аумақта металлдан жасалған, әйнектелген жерүсті жаяу жүргіншілер өткелін салу жоспарланған. Сонымен қатар лифт орнату да көзделіп отыр. Бірінші өткел Ауэзов даңғылы жағынан салынады, оны биыл жүзеге асыруды жоспарлап отырмыз, ал кейінірек Танирбергенов көшесі жағынан екінші көпір салынады. Қазіргі уақытта жобалық-сметалық құжаттама дайындалуда, – деді спикер.

Жобаны жүзеге асыру Оқушылар сарайына көлік және жаяу жүргіншілердің қолжетімділігін жақсартып, балалар мен олардың ата-аналары үшін қауіпсіздік деңгейін арттыруға мүмкіндік береді.